Velkomin á Úlfljótsvatn
Hús fyrir sumarsjálfboðaliða – gistiheimili – vinnustofudvöl fyrir rithöfunda og listamenn að vetri til.
Land fyrir endurheimt skóglendis.

Úlfljótsvatnsjörðin er 1415 hektara að stærð og í eigu Skógræktarfélags Íslands, Bandalags íslenskra skáta og Skátasambands Reykjavíkur.

Um 500 hektarar hafa verið teknir til endurheimtar skóga það sem af er. Skógræktarfélag íslands hefur frá árinu 2014 gróðursett tré til kolefnisbindingar fyrir Kolvið og í dag er sá hluti nálægt 470 hekturum (sjá kort hér að neðan). Árið 2021 var gerður samningur við 66°N um 12 hektara svæði ætlað undir fjölnytjaskóg, sem mun binda kolefni, hjálpa til við vatnsmiðlun, auka frjósemi jarðvegs, skapa skjól og vera aðlaðandi útivistarsvæði. Á þeim 20 hekturum sem út af standa af þessum 500 hekturum alls hefur Skógræktarfélag skáta við Úlfljótsvatn gróðursett mest, allt frá 1990, og er þar nú að finna vöxtulegan og spennandi útivistarskóg. Einnig er verndun votlendis og fuglalífs hluti af stjórnunarstefnu fyrir svæðið.

Með þessu reynum við að bregðast við áskorunum umhverfis- og loftslagskreppunnar með því að koma í veg fyrir frekara jarðvegsrof, binda kolefni, auka lífbreytileika og stækka skógarþekjuna á Íslandi. Við nýtum fjölmargar trjátegundir eins og birki (Betula pubescens), greni (Picea ssp.), stafafuru (Pinus contorta), ásamt elri (Alnus ssp.) og ilmreyni (Sorbus aucuparia).